كلمات الرياح فيصل الجاسم

وقفت في وجه الرياح اللي هبايبها طعون

مثل النخيل الشامخه ودموعها طاحت ثمر

واخذت من حكمه زماني درس والدنيا فنون

مثل الحصان اللي تعلم كل ما طاح وعثر

ورحلت عن دنيا وسيعه تعمي قلوب وعيون

وان البصيره فلسفه عاقل اهم من البصر

ممكن تشوف ان الزمن انثى جدايلها فتون

وممكن تشوف ان الزمن يومين وتراب وقبر

اشبه الدنيا مطار القادمون الراحلون

واشبه الاعمال فالدنيا مثل شنطه سفر

الراحلون القادمون الراحلون القادمون

ابختصرها بكلمتين وقلتها وجهه نظر

النفس مثل الطفل والانسان كالام الحنون

اذا تغاضت عن خطى غلطه وبالاخر كبر

وانا اعيشك يالشعر صاحي الى حد الجنون

ماجيت ادور بك مقام ولا يكبرني شعر

اضحك بوجه عداي قبل انه عليه يضحكون

وكم عين في وقت الملاقى من تواجه تنكسر

وانا خذيت من الحياه النجم واطراف المزون

ان ماسقيتك يالزهر اصير لك غيم ومطر

في ذا الزمان الطيب بين كل ما ضاق مغبون

والله خلق للدمع كفا يمسحه كل ما انتثر

وانا الذي لاضاق صدري قمت اهونها وتهون

والله خلقني طب لجروحي ولا طب البشر