كلمات جسر الصداقة الوسمي

الضايق اللي ساري ليله ولا حصل طريق

تلعب به الايام بين يمينها وشمالها

يا غارق بالهم لا تطلب نجاتك من غريق

الصبر مفتاح الفرج والناس هذا حالها

وانا ترى متني يشيل من الحمل ما لا يطيق

مالي ومال الحمله اللي كل كتف شالها

والدله اللي ماتقهوي ضيفها قل للبريق

يرسل تعازي ضوها لا فاحت بفنجالها

ايامنا بين الشهر واليوم والباقي سحيق

الايام كم يبغى لها والناس كم يبغى لها

قمريه الاحزان لا غنت على الغصن الدقيق

ما تعاتب المحزون لو غنت ولا غنى لها

يا ناس وش حل الرفيق اللي يعاتب له رفيق

لا حدته الايام والدنيا على منوالها

لا تحسب ان اللي تحبه لا جرحته ما يضيق

لو يستر جروحه عليك وعلته ما قالها

يضيق لكن مبسمه ضحاك وحجاجه طليق

لان الصداقه كنز والحسنه بعشر امثالها

والحقد في قلوب الرجال اهل الوفا ماهو يليق

قلوبها تبقى نظيفه لو تغير حالها

وانا لو ابني للصداقه جسر لعيون الصديق

الناس من كثر الزعل فال الله ولا فالها

العذر مايكفي من التقدير والصده تعيق

الوصل من بين القلوب اللي تمد حبالها

والالماس سعره فوق سعرك يالذهب لو لك بريق

سعره لحاله والذهب تسعيرته بلحالها

واهل الجواهر يفرقون الكهرمان من العقيق

لو تخلط الثنتين بنت في طرف سلسالها

نصبر على قرص النحل حتى نوصل للرحيق

واهل الهوى يمسح خطاياها لذيذ وصالها

والناس لاجل امالها تحتاج للفهم الدقيق

واللي ما تملك فهم تخسر نفسها وامالها

جبال الارض الشامخه يا منكر المجد العريق

هاماتنا من كبر هيبتنا تطول جبالها

جديدنا مستقبل زاهر وماضينا عتيق

مسيره التاريخ يبقى مجدنا في بالها

لو ان حضارتنا قصيده شاعر فكره عميق

ما كان غير محمد المكتوم صاغ امثالها