كلمات غرسة محمد مجموعة فنانين - كلمات اغاني

وطن عظيم وشعب مخلص وقاده

وارض علمها غير عن كل الاعلام

ارض عليها صارت اطهر ولاده

ارض النبي واصحابه الغر الاعلام

ارض الرسول وعمر وابو قتاده

منها سطع نور غشى الشرق والشام

واليوم اخو نوره وهذي بلاده

المملكه حضن العرب قلب الاسلام

يقودها وانعم بها من قياده

خادم بيوت الله وللامه امام

سلمان سلمان العزم والاراده

اعظم ملوك الارض من عرب واعجام

زعمينا واكبر من اكبر اشاده

مثل البحر يوم البحر واسع وطام

لكم على الدنيا واهلها سياده

وبارقابنا بيعه لكم والعهد تام

على خطى عبدالعزيز ورشاده

قاد السعوديه واهلها للامام

هو امتداد ابوه وانت امتداده

للدين خدام وللشعب حكام

اعني ولي العهد جزل الوفاده

هو صامل الوقفه وابو قلب عزام

حر ملى الدنيا على اول هداده

والحر مثله يعجبك وين ما حام

يمضي بنا محمد بعزم وجلاده

للمجد ويسابق بنا بيض الايام

كنه يقول لمن يبون انتقاده

قدام يا بيض المقادير قدام

يا وارث الملك العظيم وعتاده

وعراب رؤيا المملكه والتقدام

حنا فتيل الحرب وانتم زناده

اقلط بنا وابشر بنا درع وحسام

بك سطوه معزي وبك من سداده

عبدالعزيز الملهم الصارم الهام

جاها وهي ليل شديد سواده

قام ومعه حظ الجزيره بعد قام

لملم شتات الناس والحكم اجاده

توحدت من عقب ما كانت اقسام

على المشوره والكتاب استناده

يستلهم وياخذ من الشرع الاحكام

يختار قاداته ويعرف مراده

فراسته تنبيه وش خلف الاكام

واليا انتصر عفا بحلم وركاده

حتى عدوه لا انهزم ما هو يضام

الله عطا والله عليم بعباده

كريم شعب المملكه وانتم اكرام

والله جمع لك بين ملك وعقاده

وشعب تحيزم فيك وانت اطلق حزام

فاخر ومثلك يفتخر في اجداده

واحد بنى دوله وواحد فخر يام

جدك معزي فوق صهوه جواده

اسس كيان وملك في عده اعوام

وراكان جدك وانت وارث شداده

ومن مثل ابن حثلين فارس وهمام

خوالك الحثلين شيخه وساده

بيت المفاخر والبطوله والاقدام

وشابهت تركي هيبته واجتهاده

يومه على شان الحكم حث الاقدام

قام وعلى عدوانه اعلن جهاده

بالصارم اللي لا ضرب يفلق الهام

يظهر على الخصم العنيد ارتعاده

لا حرك جيوشه جبن كل مقدام

ما يحارب الا اللي يقوده عناده

ويعامل الباقين في لطف واكرام

يحرص على امن الطفل في مهاده

ويرحم كبار السن ويغيث الايتام

في مجلسه دروس علم وعباده

وبالقصر كسوه للمساكين واطعام

وللحق واهل الحق سهل انقياده

وصيه الله بالارامل والارحام

هذا الامام اللي له العفو عاده

تركي ابن عبدالله بسلم وخصام

انتم اساس الملك وانتم عماده

هذي حقايق ثابته ما هي اوهام

كن المؤسس جا على شكل اعاده

نفس الفكر نفس الشكل نفس الاجسام

حنا نشوفك حلم حنا مداده

واصل الحقايق كان مجرد احلام

رؤياك مستقبل وطن واستفاده

من كبرها تصعب على بعض الافهام

ونستبشر برؤياك خير وسعاده

ونشوف واقعها حسابات وارقام

بلد على البترول كان اعتماده

تعددت مصادره بس في عام

رفعت من شان الوطن واقتصاده

في كل درب اصلاح لك بصمه ابهام

ذي غرسه محمد وهذا حصاده

وهناك اثر كفه على وجه الاجرام

حرب على الفاسد بليا هواده

وحرب على زمره سفهاء الاحلام

وعلى المخدرات اعلنت حرب الاباده

يخوضها بامرك عساكر وخدام

خل البلد يشفى وينظف زياده

مثل الجسد لا عالجو منه الاسقام

واللي عن اليمه تشوف ابتعاده

اجتث من راسه بيمناك الاورام

قد قلت لن ينجو احد من فساده

ونفذت ما قلته على الخاص والعام

خليتو الفاسد يعيش النكاده

يدفع وهو صاغر ثمن ذيك الاثام

هذي نتايج رؤيته واعتقاده

اصبح سموه للعرب مصدر الهام

نشهد ولو ما هو بحاجه شهاده

انه علامه فارقه بين الانام

وانه صنع تاريخ فخر ورياده

تبطي وهي تكتب له وعنه الاقلام

في نفسه وشعبه نشوف اعتداده

اصبح حدث يشغل وزارات الاعلام

دمتم لنا وللشعب ساده وقاده

تبقون ما يبقى على الارض الاسلام