كلمات دمع العظيم ميحد حمد

يالغيمه اللي دوى رعدك وبرقك سرى

ترى دموع الكرام اشبه بمزن الغمام

الغيم مزنه نتاجه عشب فوق الثرى

ودموع الاكرام تصنع حزن عند الكرام

المرء ماضيه يبقى معه مهما جرى

تاريخ الانسان وسط الذاكره له مقام

عين لها دهر ما ذاقت لذيذ الكرى

تحقق المستحيل وتبدع ف كل عام

ما طاح من دمعها فوق الخدود وجرى

الواجب الخد يستقبله بالابتسام

هذي دموع الكريم الطيب اللي ظرى

على مصادم كبار المعضلات الجسام

يوم انبرت له صواديف الزمان انبرى

لحلها رافع راياته الى الامام

لا يفرح الشامت اللي عنه ماحد درى

ما طاحت من القهر والعشق والا الهيام

طاحت على اللي حضنها كان ظل وذرى

كانت بدايه طموحاته ما كانت ختام

الصبح يبدا بطاريها لا منه طرى

وان نامت الكون كله في عيونه ينام

وصى عليها رسول الله بين الورى

ثلاث مرات لين اسمع جميع الانام

فرحمه الله لها من رب ام القرى

ولخاتم الانبيا مني عليه السلام

دمع العظيم ف رحاب الام يا من ترى

شعور لو جيت ابا اوصفه شاب الكلام