كلمات المطر الوسمي
المطر
يالله بمزن ماطر نستخيله
يهمي بجود من سحايبه هتان
يبطي له ايام يتراضف هميله
تلضي بروقه و مرعده يبات دنان
يا لين تحيا به القفار المحيله
تعشب منابيته وتخضر الاغصان
و تبهج هماليله نفوسن عليله
تفرح ليود الغيث و الجو لي زان
مع ربعه اللي له طبايع اصيله
محفوظ قدره دايم و مول ماهان
رافق لك اللي ما يمن بجميله
وعند المواقف يتضح طبع الانسان
السامي اللي ما تبع كل ميله
وعلى يمينك تذخره لجور الازمان
والا الردي جنبه و احذر تجي له
لا صكت الحلقه تراها ع الابطان
كم من سعاده في الامور القليله
لكن شغلنا عنها بعض الاحزان
ولا كل شخص تستهم لرحيله
ترى الفراق لصالحك بعض الاحيان
والرزق بيد الله تعالى و كفيله
ماهو بيد فلان وفلان و فلان
يا ربي ياللي بالدعا نلتجي له
تغفر لنا الزلات يا عالي الشان
المشاهدات148
معلومات عن المطر الوسمي
سجل دخول لرؤية تفصيل العمل و إمكانية نسخ الكلمات
احصل على معلومات مفصلة عن العمل الفني، الملحنين، المؤلفين، والملاحظات
تسجيل الدخولحساب جديد