كلمات مطول الغيبات محمد القحطاني

يامطول الغيبات ما ابغى الغنايم

كمل غيابك خاطري عاف لقياك

لا الحب دايم لك ولا الشوق دايم

عند الكرامه باتجاهلك وانساك

كنت احسبك جو الشتاء كنت غايم

ونور البدر مصدر شعاعه محياك

واجيك كلي شوق ماجيك لايم

واليوم الومك يوم هذي سواياك

لجلك تحملت القهر والظلايم

وعطيتك اللي ماحد قبلي اعطاك

وخليتني مابين طايح وقايم

مر تحت سكينك ومر ذكراك

صمدت واتقبلت كل الهزايم

تعال جرب موقفي واتحداك

الصد ماله عذر لو كنت هايم

مدري وش الي بعد ما اوفيت لك جاك

ماشمت من فعلك وانا منك شايم

عطيتك اكثر من كرامتك ورضاك

عدت سنه وانا من الوصل صايم

هذا اختيارك والله يعلم نواياك

واليوم لو تاتي بكل الغنايم

معاد لي خاطر بوصلك ولقياك