كلمات رجا فهد الكبيسي

ياالله لا تقطع رجا عبدك من العلم اليقين

في خليل ما قطع وصله ولا عني سلا

ذاك لا مني طريته طاح قلبي في اليدين

وفزت عروقي تصوت

مرحبا الف وهلا

كل ما ضاقت لقيته يلوي ذراع السنين

همه ارتاح وما احاتي هذا من زود الغلا

البلا لا قال احبك سلهمت عينه حنين

البلا سلهام عينه هذا هو ساس البلا

من يلوم العين منهو لا اغفلت عن كل زين

من يشوف اوصاف خلي يدري وش معنى الحلا

لا قسى وقتي لقيته من طرف صبعه يلين

يا عسى ما اذوق حزنه لا عدم منهو خلا

ما يزين الجو ابد لا فضى له ما يزين

مير شوفه يبري العله ويغلي يا ملا

من يقول الحب بلاوي قلت زدها بلوتين

كل بلوى تشكر البلوى على قلب ابتلا

يا الله لا تقطع رجا عبدك من العلم اليقين

في خليل لا لفاني راح همي وانجلا