كلمات انت وضميرك مزعل فرحان

ابتركك للوقت وانت وضميرك

اما تغيب العمر ولا تجيني

بالحيل ضامي ما رواني غديرك

بالحيل عنك بعيد لا تحتريني

انا ضرير الوقت وانا ضريرك

بعيد لكن كنك قدام عيني

يمكن مع الايام بحب غيرك

ما دام قلبك صادق ما يبيني

يمكني ادله وانكر اني عشيرك

وبعد ارتحال العمر يمكن تجيني

ما بقي لي للحب ما ابي كثيرك

ارجوك عطني بس لو بعض ديني

شرك محى في صفحة العمر خيرك

وحبك تركني هايم في سنيني

وانا ادري ان كل الحكي ما يثيرك

لكن لزوم اقول وش صار فيني

لابد ياتي يوم تعرف مصيرك

وتقول بعد غياب عامين ويني

خل الهوى خله لغيري وغيرك

ذا ما جنت ايديك ما هي يديني

ابتركك للوقت لازم يديرك

وان جيت ابصافحك فاقطع يديني